Lajm i mirë për shoferët shqiptarë: Marrëveshje mes Autoshkollës Qendra dhe MS Kod 95 Slloveni për pajisjen me Kodin 95 në gjuhën shqipe

Prishtinë, 11 shtator 2025 – Drejtori i Autoshkollës Qendra, Dr. Lavdim Hamiti, ka arritur një marrëveshje të rëndësishme bashkëpunimi me përfaqësuesen sllovene MS Kod 95 Slloveni, që do të mundësojë pajisjen e drejtuesve të mjeteve me Kod 95 në mënyrë të lehtësuar dhe të përshtatur për tregun shqiptar dhe atë të diasporës.

Kodi 95 është një certifikim i detyrueshëm për të gjithë shoferët profesionistë që synojnë të operojnë me kamionë dhe autobusë në vendet e Bashkimit Evropian. Ky kod është dëshmi që drejtuesi ka përfunduar trajnimet dhe testimet e nevojshme sipas direktivave të BE-së për transportin rrugor profesional.

Në kuadër të kësaj marrëveshjeje, trajnimi dhe provimi do të ofrohen tërësisht në gjuhën shqipe, një risi që eliminon pengesat gjuhësore për shumë të interesuar nga Kosova, Shqipëria dhe diaspora shqiptare në Evropë.

Në një intervistë për Blic Albania, Dr. Lavdim Hamiti thekson se kjo marrëveshje përfaqëson hap të madh drejt profesionalizimit të sektorit të transportit rrugor, duke u dhënë mundësi reale qytetarëve shqiptarë që të pajisen me këtë certifikim në mënyrë të sigurt, legale dhe të kuptueshme.

“MS Kod 95 Slloveni është një partner serioz dhe i certifikuar në nivel evropian. Ne jemi krenarë që, përmes këtij bashkëpunimi, Autoshkolla Qendra bëhet ura që lidh profesionistët tanë me tregun evropian të punës,” – u shpreh Dr. Hamiti.

Pajisja me Kod 95 në Slloveni, përmes kësaj marrëveshjeje, jo vetëm që respekton të gjitha standardet ligjore të BE-së, por njëkohësisht ofron trajnime cilësore, në një gjuhë të qasshme për aplikantët shqiptarë, duke i bërë ata më konkurrues dhe më të përgatitur për tregun ndërkombëtar të transportit.

Ky bashkëpunim pritet të nisë zbatimin në javët në vijim dhe tashmë ka zgjuar interes të madh në mesin e shoferëve profesionistë.